Parikrama Narmada Maiya Ni - Gujarati eBook

જે પુસ્તક હમણાં વાંચીને હાથમાંથી હેઠું મૂક્યું, પણ હૃદયમાં પૂરું છપાઈ-છવાઈ ગયું છે, તે છે શ્રી અમૃતલાલ વેગડનું 'સૌંદર્યની નદી નર્મદા'. એમનું પહેલું પુસ્તક 'પરિક્રમા નર્મદા મૈયાની' પણ ખૂબ જ વખણાયું. પછીનું આ બીજું પુસ્તક. આ બે એમના કીર્તિદા પુસ્તકો છે. શ્રી વેગડની પરિક્રમા સૌંદર્યમુગ્ધ સર્જકની છે. આ પુસ્તક વાંચીને વાચકમાં જેટલી શ્રદ્ધા-ભક્તિ પ્રગટશે, તેથી વધુ તો એની સૌંદર્યદૃષ્ટિ ઊઘડશે. પુસ્તકમાં માત્ર નદીનું જ સૌંદર્ય નથી ઊતર્યું, ભારતવર્ષનું ભાતીગળ સૌંદર્ય પણ કંડારાયું છે. એમની સરળ શૈલીમાં વિનોદની ધારા પણ વહે છે. પ્રવાસ સાહિત્યમાં આ બે પુસ્તકો નોખા-અનોખાં લાગે એવાં છે. - જયન્ત પાઠક