Want liefde maak lig (Afrikaans Edition)

Sy voer ’n voortdurende stryd met haar liggaam en swak selfbeeld. Kan ’n nuutgevonde liefde haar leer om haarself te aanvaar soos Jesus elke mens liefhet en ons aanvaar?

In Want liefde maak lig vertel die bekroonde skrywer, Helena Hugo, Isabelle Karsten se aangrypende verhaal. Isa is ’n aantreklike 35-jarige vrou van Florida Heuwels in Johannesburg wat haar lewe lank met ’n innerlike seer worstel - alles toe te skryf aan die enorme 160 kilogram wat sy weeg. Sedert haar ouers se dood is Isa van haarself afhanklik en is sy die persoonlike assistent van Johan Steyl, senior advokaat en oudkollega van haar pa. Toe sy seun, Johan junior, en die man op wie sy van kleins af heimlik verlief is, uit Amerika terugkeer en die aakligste aanmerkings oor haar voorkoms maak, bedank sy haar werk. Sy kry ’n pos by haar kollega, Amanda Nolte, se gemeente. Daar ontmoet sy die frisgeboude jeugpredikant, Adam Wiese, wat van haar hou en haar begin uitneem. Maar sy vertrou hom nie en dink hy kry haar net jammer.
Sal Isa en Adam hul probleme kan oorkom, of sal die geraamtes in haar kas in die pad van ware geluk kom?

Helena se uitstekende skryftalent en vermoë om ’n storie op ’n aangrypende wyse te vertel, maak hierdie ’n moet-lees boek vir elke fiksieliefhebber en sal die leser meesleur en boei tot aan die einde.